國學大師饒宗頤有「潮州之寶」嘅稱譽，今年八月，佢就踏進人生第九十五個生辰。潮州鄉賢尋日趁新春團拜，提早向饒公祝壽，饒公預告今年將移師敦煌搞世紀壽宴，城中「潮人」據講亦會空群出動，潮州商會永遠名譽會長莊學山將為饒公之行踩線鋪路；會董高佩璇更會做饒公「護法」，陪佢坐飛機，隨行照料；會長許學之則廣發英雄帖。
逾百位「潮人」尋日新春團拜時，高佩璇話，「賀壽團」將喺八月八號抵達敦煌莫高窟，行程包括展示饒公以敦煌為題嘅一系列書畫作品，主題係「莫高餘馥」，由饒公親自拍板，又邀請中港台學者舉行研究會，當然唔少得最有分量嘅賀壽宴。
饒公拍心口話身體好Fit，搭飛機絕冇問題。港區人大代表王敏剛則喺旗下敦煌酒店預留逾三百間房接待饒公同嘉賓。