高錕前日應中大工程學院邀請，同一班工程學院教職員、舊生共進晚餐，但佢到場冇耐，已經感到不適，未食飯已經要提早離場，話返去酒店休息一下。有讀者睇唔過眼，向本集團投訴中大將高錕當作宣傳工具，拉去呢度，又拉去嗰度，好似勞役人咁。呢位讀者擔心高錕已淪為一個不能自主嘅宣傳機器，仲話高錕不適離場，令人既心痛又憤慨。

寒流襲港 正常人都難捱

自從返抵香港後，高錕嘅生活就好忙碌，先係中文大學喺今個月初搞個慶祝大會，繼而高錕母校聖若瑟書院又請咗佢出席開放日；新春期間，上禮拜四年初五，高錕又去咗由馬會搞嘅全港首間為老人癡呆症患者而設嘅耆智園參觀，跟住再出席晚宴，梗係受唔住啦。唔好忘記，呢輪寒流襲港，正常人風塵僕僕都難捱啦，更何況抱病在身嘅高錕？

高錕去咁多地方，都係因為啲團體想藉佢嘅名氣宣傳科技、醫療等，同時亦為院校、團體打響名堂，由於高錕計劃留港兩個月，所以啲團體安排嘅行程更加緊密，下月十四號，佢又要返中大出席步行籌款活動。香港既然當高錕係寶，就應該多啲愛惜佢嘅身體啦！