「三碌拎」硬係擺脫唔到「條條Fing」嘅宿命。呢嗱，纜車服務因為「天氣惡劣」，農曆初一、初二連續兩日多次暫停服務，其中初一更幾乎停足一日。唔少市民諗住一嘗搭纜車去寶蓮寺嘅滋味，結果要改搭巴士，遊興當堂冇咗一半。加上纜車公司訊息遲緩，安排混亂，旅客更加一度鼓譟。最慘就係昂坪市集啲商戶，纜車跪低，冇遊客到，生意直頭少咗九成。

刮大風令到纜車停駛就話聽過啫，前幾日除咗凍啲、濕啲、間唔中落幾滴雨之外，天氣唔係特別差吖，何來「惡劣」呢？纜車公司話，導致連續兩日要暫停服務嘅元兇，可能係因為本港濕度高達百分之九十八，導致訊號系統數據流失，系統無法正常運作喎。佢哋目前暫時冇對策，會盡快同意大利生產商聯絡，希望「回南天」之前解決問題。

叮！太一叮呢鋪真係抓晒頭，香港天氣成日都咁潮濕㗎啦，每逢落雨，濕度達到百分之九十幾係好平常嘅事。纜車啟用咁多年，冇聽過純粹因為濕度太高要停止服務，人哋喺雪山運作都冇事，纜車公司有乜解釋？

再講，如果呢個系統咁「矜貴」，郁吓就「濕滯」，講白啲即係根本唔適合本港潮濕多雨嘅天氣啦。有關當局決定選擇現有系統前，有冇考慮過呢方面因素？抑或係隔山買牛，睇都唔使睇，諗都唔使諗，買返嚟至算？

除咗各種天氣因素之外，昂坪纜車亦有唔少事故同機械故障與人為錯誤有關，服務質素一直為人詬病。佢哋舊年嘅客量得一百四十萬人次，比前年少二十萬人次，原因係要用幾十日時間進行兩項涉及纜索嘅重大維修保養。

話時話，昂坪纜車自啟用以來停駛事故不斷，已經當食生菜啦。○七年因為操作不當，曾發生轟動一時嘅「六月飛廂」事件，好彩冇人命傷亡；舊年年底喺救援演練期間又再發生纜車撞塔架事故，纜車公司事發後兩日至通知機電署，涉嫌違反有關操作保養規例。

講真，昂坪纜車投入服務咁耐，市民就驚足咁耐，唔係呢度出問題，就係嗰度發現狀況。話到尾，港府作為最大股東，根本就冇盡到監管責任。正如有機械工程師話齋，長遠嚟講，應該對成個纜車系統進行改良。淨係頭痛醫頭，腳痛醫腳，問題只會愈積愈多，愈爆愈大鑊。叮！