其實，真正要問的是煲呔曾為何不敢以真面目示人，砌詞「演技」欠佳，搵麥兜過橋。莫非煲呔曾有自知之明，年尾流流市民都不想見到佢副尊容，才藉詞「鼓勵創意」，連錄製真人賀年騷都可免則免？

網民大罵煲呔曾借麥兜一家人塗脂抹粉，政治化妝，有心水清的網民發現，這齣三十秒賀年短片結尾，煲呔曾夫婦與「全體港人」向市民拜年的大團圓一幕，人頭數目竟然是「十四」之數，又會咁啱？新正頭唔好咁搞法啩。睇真啲，十四個人頭之中，原來還有一個BB在媽咪懷中，可以湊夠十五個人頭。不過，扣除站在麥兜身旁的擬人化老虎仔，都係得番十四個人頭，「全體港人」由十四個人代表，煲呔曾搞這場賀年動畫騷，認真好帶挈。

雖說動畫是虛擬世界，講到生肖流年，始終要注意相生相剋。現實世界，猛虎與豬是否可以和平共存呢？煲呔曾搵意念來自豬的麥太麥兜串演虎年賀年騷，有如送豬入虎口，條橋一開始已經係錯嘅，難怪網民如此憤怒啊！

說起意頭，旅發局大年初一的花車巡遊，也弄到不少市民頻呼大吉利是。何解？今年花車巡遊主題體現旅發局的「香港節慶年」主題，大會編排的表演圍繞每個月份的節日。去到萬聖節的環節，一批「扮鬼」的舞蹈員突然現身，青面獠牙、骷髏骨頭和殭屍遊走在彌敦道街頭，新正頭突然出現這些異形，雖說只是一場得啖笑的表演，但新正頭強迫市民「見鬼」，還透過電視直播至全港千家萬戶，在節日的歡樂氣氛中認真反高潮。

所謂入境問禁，農曆新年始終是華人社會的傳統大節，好心旅發局班高層留意民風習俗，以為百無禁忌想做就去做，好易撞板。市民樂意與來自海外的「鬼佬」旅客共度新春佳節，但「撞鬼」就咪搞了。