過年前，煲呔曾學人搞搞新意思，推出一齣自己同漫畫人物麥兜合演、名為《回家真好》嘅動畫，代替一年一度嘅新春賀辭，向港人送上新春祝福之餘，又想推廣吓溫馨家庭價值觀。不過，動畫播出一個禮拜，外間嘅反應似乎麻麻地，好多網民更喺網上發起聲討行動，仲組成逾千人嘅群組，嚴斥麥兜被賣、不滿煲呔曾擄劫麥兜等。
網民話，呢齣動畫可以話係煲呔曾抽麥兜水嘅傑作，有人質疑馬頭圍有居民受冧樓影響，家都冇埋，邊度有家可回？亦有人話樓價高企，買唔起樓，無以為家，點感受到回家嘅好處？更多人質疑煲呔曾搵麥兜拍動畫係好驚面對市民，可惜條片睇到人毛骨悚然；有啲網民直情話要同麥兜講拜拜，即係唔再捧場咁解。
好好嘅新春賀辭，竟然變成一宗網民質疑煲呔曾綁架麥兜嘅事件，可見民望低落嘅煲呔曾真係累人累物，一方面累咗麥兜嘅創作人麥家碧，搞到網民連番質疑麥兜被賣，另一方面又犧牲埋形象可愛嘅麥兜，因為佢被批今日嘅形象唔再反映時弊同社會不公，仲有人質疑佢冇咗昔日嘅基層形象。呢鋪之後，睇怕麥兜都有排洗底，或者煲呔曾呢齣動畫應該叫「綁架真好」！