本文重點
公社兩黨嘅五區議員請辭後,建制派統一行動引嚟唔少評論,建仔立法會議員陳鑑林(橄欖)尋日透露,喺唔谷高補選投票率嘅前提下,預料唔少該黨擁躉都會去投白票,而佢哋都正着手研究點樣將一點五九億元嘅補選經費,喺預算案中抽出嚟做修訂,至於點做佢就唔肯透露,恐怕又有一場爆肚騷。
擬修訂補選撥款議案
橄欖尋日同傳媒團拜,透露遲啲嘅補選可能會係一場白票運動,而佢都打算修訂補選撥款議案,結果係點?咪就係想話畀大家知道,呢場補選非常胡混囉。
講番早前五區請辭時建制派離場致流會一役,橄欖話根據劇本,原本係建仔主席譚耀宗起身發言:「我哋離席抗議」,跟住佢先要求點算出席議員嘅人數,點知譚耀宗滋油淡定,遲遲都未開聲,於是佢即刻爆肚要求索取五個辭職議員嘅發言稿,同時打斷咗黃毓民發言。
佢仲話,當日有份離場抗議嘅工聯會議員王國興一邊離場一邊抗議都係爆肚加場嘅。