本文重點
曾經為「小甜甜」龔如心同「賭王」何鴻燊「種生基」改運嘅風水師俞志麟，尋日以「小窮相士」署名，喺報章刊登一篇題為《一個術數家之心聲》嘅聲明，話「縱然有人出價千萬要本人替某商人種生機（基），本人已回覆就算給我一億，我亦不會埋沒良心，與全港市民為敵。」佢又勸某商人要多啲做善事補過。
「唔係個個都係為錢」
俞師傅話喺今個月八號，有兩個客人去佢嘅辦公室批流年，之後出示咗一個人嘅八字，問可唔可以同佢種生基，幫佢打贏場官司。俞師傅攞上手一睇就知個八字係屬於邊個嘅，個客仲講明可以出五倍價錢種一次生基，但俞師傅即刻一口拒絕。
個客人好失望，同俞師傅講：「你做呢行，都係為錢啫！」俞師傅就更加反感，並且同個客講唔係個個風水師都係為錢，就算個客之後話可以畀「同王太（龔如心）同價」，即係成一千萬，呢單生意都唔會接。俞師傅冇講嗰位客人係邊個，搞到全城都估估吓。