新正頭好多人都望萬象更新，但有啲蘇州屎卻無可避免要帶落新一年。白鴿黨嘅甘乃威舊年搞出單好感事件，立法會成立嘅委員會今年勢必開始調查。早前有術數界人士批算甘威嘅運程，話佢今年感情運麻麻，部分月份仲比較難過，係咪暗示甘威單好感事件手尾長呢？
甘威被批四月不利夫妻宮，可能要解決感情問題；九月同十二月都唔易輕鬆度過，雖然最後都有驚無險居多，但都夠晒煩啦。
咁啱得咁蹺，甘威今年要面對立法會調查佢嗰單好感事件，早前委員會開會後，決定暫時唔用特權法召女事主上立法會作供，但都留咗條尾巴話唔排除隨時會用，如果到時立法會都係搵女事主上去，咁甘威嘅感情事勢必成為政治連續劇，到時甘威可能有排頭痛。