唔經唔覺，新春假期已經結束，醫管局主席「肥胡」胡定旭喺呢個假期全情投入醫院工作，事關佢靜雞雞做「新春愛心大使」多年，今年除夕夜至年初二，三日內走訪八間醫院，向病人噓寒問暖之外，仲用幾種方言氹病人，呢個主席真係唔易做。
新正頭出入醫院，有啲人可能覺得大吉利是，但肥胡就百無禁忌，連日嚟都帶埋賀年糖果、頸巾、手襪同大桔向病人送暖，肥胡見人就大派笑彈，遇到一位嚟自福建嘅九十歲婆婆，佢就用僅有嘅福建話同對方拜年，轉頭遇見一位講上海話嘅伯伯，就轉頻道以上海話慰問對方。
除探癌症患者、病童之外，肥胡仲專登去睇吓四肢癱瘓嘅斌仔，佢話睇見病人受病魔纏繞，自覺健康非必然。初二夜晚，肥胡去咗紅館聽張敬軒音樂會，但佢唔係去追星，只係當晚演唱會部分收入會捐畀伊利沙伯醫院，所以肥胡梗要捧場。