傳統盆菜係圍村人過年唔少得嘅菜式，年初三夜晚，元朗屏山鄧氏宗祠內鑼鼓喧天，六百人逼爆祠堂，參加為屏山鄧氏後人兼著名時裝設計師鄧達智（William）媽媽八十一歲生日舉行嘅盆菜宴。鄧氏唔少親戚遠道喺外國返港，William請嚟一對麒麟為媽媽拜壽，仲有醒獅隊表演打觔斗同凌空飛腿，睇到啲外籍賓客目瞪口呆，拍掌叫好。
呢一晚，William一家大團圓，佢細佬一家移民多倫多後，十幾年未返過香港，當晚帶埋太太Barbara同囝囝鄧卓謙、鄧卓浩探望鄉親；William姐夫就拖埋囡囡同未來女婿由英國返嚟飲喜酒，氹到鄧媽媽好開心。
William話，搞盆菜宴最初只為娛己，估唔到反應奇佳，一搞就十幾年，唔少設計界好友同外國傳媒今年聞風而至，令祠堂座無虛席，William要臨時加開五席至四十八席，本來想再加枱，但大廚話廚房食物已清晒，唔夠餸分。賓客堆中，我哋發現國泰企業事務董事莊偉茵，佢慨嘆香港過年氣氛愈嚟愈淡薄，難得屏山咁熱鬧，一於帶埋老公黃楚權嚟開餐。