術數師楊子東批算議員運程時指出，阿Paul命格從官格，以火土為用神，由五十歲開始踏入午火大運，用神得真，庚寅年有寅木生旺午火，有助加強運氣；至於方剛就八字從火土格，大運喺戌，同庚寅年嘅寅戌合火，四月同八月聲威大振；卿姐嘅運勢都唔錯。

阿Paul同方剛分別代表旅遊界同零售界，佢哋有運對業界應該有正面作用。白鴿黨嘅卿姐就喺高鐵一役獲中間人士好評，佢喺議會掌管財會，又係白鴿黨嘅核心人物，行運之年，可能令佢從政之路更加順利。

發叔要注意健康

至於虎年運程冇咁理想嘅都有幾個議員，包括專業會議成員何鍾泰、劉秀成，另外仲有富貴黨主席劉健儀（Miriam）等。據批算顯示，Miriam年內承受嘅壓力好大，可能要入咗冬季先比較安穩。

最後，仲有一啲被批為「平淡是福」嘅議員，包括李卓人、李華明同劉皇發。發叔喺庚寅年地位依然舉足輕重，政府繼續要靠佢老人家掃除障礙，但要注意健康，尤其係正月、二月同五月，不宜太過勞累。

上述結果可謂信則有、不信則無，到底啲議員係行運一條龍定運氣麻麻，就要大家拭目以待喇！