小白觀點:
有調查發現,愈嚟愈多年輕一代過年唔出門,寧願匿喺屋企網上團年、網上拜年、網上放炮仗,乜都可以上網喺虛擬世界做晒,有人慨嘆會搞到人與人之間嘅關係愈嚟愈冷漠。
我就覺得喺網上拜年不知幾好,千祈唔好忽視拜年對青少年心智發展嘅影響呀,有個男明星曾經講過,佢當年成日掟結他懶反叛,原來係因為細個時,年年要被迫成家着晒唐裝衫出嚟影賀年全家福拜年封面相。
至於新一代嘅小朋友就更加難搞,你知啦,全盒入面一般只有瑞典糖或小白兔糖,好少有K仔或者「白瓜子」,叫佢哋點揾銀呀?
其實唔單止青年人唔想拜年,麻甩佬都一樣頂唔順,明明已經成面鬍鬚,奇在總有啲三姑六婆一定會埋嚟搣吓佢塊面話:「你當年手抱咁大,我幫你沖過涼o架!」問你怕未!
阿豪觀點:
畀人催婚滯過食煎堆
呢幾日農曆年公眾假期,相信各位讀者都去咗唔少親戚朋友屋企拜年,如果你仍然未結婚嘅話,就梗係收穫豐富過肥年啦,但對於要派利是嘅朋友嚟講,就係每年一次嘅破費日子……
唔知係咪因為呢個緣故,聽聞愈嚟愈多人足不出戶過「虛擬年」,連禮物呀、利是呀,都係喺網上send嚟send去。
嘩!世上邊有咁笨嘅事o架?有利是都唔逗,咁搞法點過到肥年呀?但諗真啲,網上過年都可能一家便宜兩家着喎。對於要派利是嘅人嚟講,避年梗係上佳選擇啦,而對於好似豪伯呢類有番咁上下年紀,但仍然「小生尚未娶妻」嘅人士嚟講,呢幾日聽到嘅「幾時輪到你呀」、「你要努力喇」之類嘅說話,真係滯過食煎堆油角㗎!內地農曆年連放七日假仲大鑊,一年火力集中喺呢幾日狂轟濫炸。所以話呢,下年睇怕都要上網避年囉。
網友觀點……
李怒眉:想避年嘅話連網都唔好上!
陸克文:可唔可以用paypal收利是?
奀仔:網上同外地嘅親友拜年好方便o架,本地就不必喇。
老馮:想啲後生跟你去拜年都難,過「虛擬年」勢成潮流!
風車:乜都網上click兩click做晒,做人仲有咩樂趣可言呀?恭喜發財!