其實唔止街市，今年春節成個消費市道都唔錯，食肆爆晒棚，商舖其門如市，外遊團就算加咗價，一樣團團爆滿，表面睇確實係丁財兩旺。無他嘅，過年大過天，一年一次，使大咗啲都無所謂。

不過咁，市道暢旺唔代表本港經濟狀況真係改善咗，至怕呢啲不過係虛幻假象，就好似今晚維港上空啲煙花咁，滿天璀璨，閃爍奪目，但稍縱即逝，正如有人話齋，一剎那光輝唔代表永恒。

有市民話，今年過年會外出消費，不過之後就未必咁手鬆，一定會「睇住嚟使」。好似從事物流業嘅王先生咁，辦年貨、去旅遊已經使咗成萬蚊，佢擔心公司今年繼續凍薪，冇計喇，過完年「惟有着少啲、食少啲」。唉，呢啲咪叫「一節淡三墟」咯！

話時話，全球經濟飽受金融海嘯衝擊，依家都未完全穩定落嚟。加上歐洲債務危機未有解決迹象，中美兩國隨時會爆貿易戰，內地收緊銀根嘅趨勢愈來愈明顯，連一向後知後覺嘅曾蔭權早排都話，擔心本港今年會出現「雙底衰退」。唔明？咪即係衰完又嚟衰過囉。一句講晒，經濟前景絕對不容樂觀。

雖然港府高官成日話最壞嘅情況已過去，其實升斗市民根本享受唔到經濟復甦嘅成果，苦況毫無改善。基層市民日子難過，政府庫房就豬籠入水，唔單止財爺曾俊華舊年預測嘅四百億元赤字唔會出現，有會計師預期，港府本年度最少可以錄得一百億綜合盈餘添。

面對社會各界要求派糖嘅呼聲，當局好似借咗聾耳陳對耳咁，詐聽唔到。鬍鬚曾堅持要做守財奴，甚至公然喺網上發表「我不派糖」嘅文章。當局無心扶貧，已經引起市民極大反感。

過年前有關注貧窮團體踩上禮賓府，送咗圍「貧富團年宴」畀班高官，菜式包括「衝擊特首唔老脾」、「寸爆財爺無良心」同「塞米高官正貴蛋」等。唔知班高官有冇興趣今日開年飯試整呢幾味，體驗吓民間疾苦呢？

無論點都好，今年係虎年，希望香港經濟虎虎生威，個個龍精虎猛，港府千祈唔好將虎年變成「苦年」吖，叮！