家住危樓，真係好得人驚。砰一聲，土瓜灣一幢唐樓忽然倒冧，釀成多人死傷；轉個頭，同排舊樓又忽然裂開六吋闊嘅大裂縫；無幾日，大角咀一幢舊樓裂開十吋闊嘅裂縫；失驚無神，又輪到九龍城一幅舊樓圍牆畀隔籬打樁工程震冧；早幾日，大家都見到屋宇署用碎石機拆除冧樓現場附近嘅舊樓，摧枯拉朽，啲牆好似威化餅咁。可見全港舊樓危機四伏，啲住戶心裏忐忑不安，唔知幾時輪到自己遭殃。

於是乎，發展局局長林鄭月娥尋日話，將來市區重建會改以地區為本、由下而上嘅模式進行，其中一個做法係由舊樓業主向市區重建局主動提出重建意願，然後由市建局做中間人，安排重建商或發展商入場。

林鄭嘅建議一旦落實，的確係一件好事。香港舊樓重建之所以咁慢，其中一個原因就係市建局一味向錢看，淨係推動啲回報較高嘅項目，如果改由業主主動提出，可以大大加快啲危舊樓宇嘅重建。此外，部分業主住開有感情，唔想搬，亦係清拆舊樓嘅一大阻力，依家土瓜灣發生冧樓慘劇，雖然係不幸事件，但就無形中加大咗舊樓重建嘅說服力。政府成日都話「轉危為機」，呢啲咪就係「轉危為機」囉！

不過，講係一回事，做唔做得到又係另一回事。特區政府言過其實、失信於民嘅往績好似一匹布咁長，較經典嘅包括當年佢哋將房委會旗下嘅部分停車場同商場物業交畀領匯上市，啲官員信誓旦旦話唔會損害住戶利益，結果領匯過橋抽板，瘋狂加租，搞到啲商戶住戶叫苦連天。二○○五年，當局喺公立醫院推行藥物名冊，當時亦實牙實齒話唔會出現無錢無藥醫嘅情形，結果，唔單止無錢無藥醫嘅例子屢見不鮮，甚至出現見錢先至救人嘅無良事件。

唉，點都好啦，重建舊樓關乎人命安全，太一叮都希望林鄭今次言出必行，牙齒當金使。如果冧樓慘劇可以令政府痛定思痛，加快重建，保障全港舊樓住戶嘅安全，都可以聊以告慰慘劇死者在天之靈。反過嚟講，如果林鄭齋講唔做，將來倒塌嘅唔止係危樓舊樓，仲包括特區政府嘅管治誠信。近排有多個民調顯示，特區政府同官員嘅民望屢創新低，再唔做番啲好事，睇怕神仙都救你唔到，叮！