「我都好想知點解唔賣得呀！」一眾推出嘲諷曾蔭權產品的年宵攤檔檔主，不約而同難掩失望之情。一班「80後」大學生，去年以三聚氰胺牛奶樽大賺近五萬元，今年再接再厲以「慳電膽」鬧劇為題，大賣吹氣慳電膽，去貨速度卻遠遜預期，由首日賣六十八元減至三十八元，也未能打動市民，昨晚再劈價至二十五元，但仍估計要損手萬多元。

以嘲諷曾蔭權為題的產品在年宵市場隨處可見。	放大圖片	放大圖片

「鏹水遮」夠過癮有錢賺

另一年宵攤檔則製作煲呔咕，最初銷情慘淡，在年廿九早段時仍剩下大半貨物，即使是全場獨家貨品，檔主惟有無奈減價促銷，由九十八元降至六十八元，銷情才見好轉，至昨晚再要劈價至三十元，才勉強平手離場。檔主大學生Kenny稱，原以為政治人物會大受歡迎，沒料實情相反，「今次揀曾蔭權，無非佢今年負面新聞特別多，估唔到會畀佢累死。」

一班年輕人推出「鏹水遮」，成功把時事轉為商機，發個新年財。	一批「80後」以出位創意，在年宵市場創出佳績。	檔主Daniel稱以「慳電膽」鬧劇為題的吹氣公仔，銷售速度遠遜預期。

反觀市民關注的民生議題，以其做賣點的產品大熱。一班香港大學學生度出絕世好橋，以今年熱爆全港的「鏹水彈」為靈感，設計「鏹水遮」，有市民也大讚過癮。負責人Terry表示，除話題夠貼切外，他亦記得「年年行年宵都會落雨」，雨傘必可大派用場。今年也不例外，年廿八短短下雨兩分鐘，已賣出至少十把雨遮，雖然售價由最初的八十八元降至六十八元，最後因下大雨而要再減價至四十八元，總計仍賺萬多元。

學者：用佢真係無運行

一直研究社會現象的次文化堂社長彭志銘直言：「大家都唔想見到佢（曾蔭權），又點會賺到大錢呢？」他指按過往經驗，與曾蔭權有關連的產品通常都滯銷，「有朋友『唔信邪』，在去年書展設計了幾萬隻曾蔭權頭像的彈彈波，但賣唔夠一百隻，蝕了八至十萬元。」他語重心長奉勸年輕人，「唔好再用佢喇，真係無運行。」

中文大學創業研究中心項目總監蔡明都指出，青年人既掌握潮流脈搏，也關心時事新聞，所以每年均有很多諷刺時弊的年宵產品，但未必最賺錢，「對他們來說，賺蝕是其次，參與過程才最重要。」