話說鄺先生喺廟街經營花檔已經近四十年，生意好嘅時候都會租一架貨車停喺店外做臨時倉庫。咁多年嚟未出過事，以前食環署人員見到亦冇出聲。其實，同一條街有好多個花檔都係咁做，但一直都冇事發生。

點知食環署今年唔知抽起邊條筋，年廿八嗰日忽然派咗十幾個人嚟，話架貨車阻街非法，並作出檢控，仲將車上嘅花全部帶走充公。咁鄺家就慘嘞，車上有跳舞蘭、百合、玫瑰、銀菊等等，價值十幾萬㗎，第日食飯食粥都睇佢喇。加上好多花都係客人預訂嘅，如果冇貨送，咪失晒信用，以後仲使唔使做生意呀！

鄺先生外出返嚟見到成車花冇晒，氣到肺都炸埋，愈諗愈嬲，就去食環署辦公大樓企跳，好在消防員動作夠快，唔係又多個冤魂。

講真，食環署咁樣做真係形同攞命。近年香港經濟不景，花檔生意麻麻。好在春節前天氣回暖，加上今年情人節同大年初一又係同一日，諗住博番兩日，搵幾餐粗茶淡飯。點知碰到呢班煞星，搞到血本無歸！叮！

講番轉頭，執法唔係唔啱，但法律不外乎人情，使唔使趕盡殺絕呀？如果花販違例，最多咪罰款，或者勒令佢哋將架車開走囉，有乜理由將啲花全部充公呀。

叮！食環署野蠻執法已唔係第一次，例如佢哋曾經喺天水圍掃蕩小販，將一個六十五歲嘅小販追到被迫跳河，食環署人員竟然冇報警，眼光光睇住佢沉吓浮吓，卒之沉落水底，佢哋先至召消防員打撈，可惜已救唔番。大佬，人哋搵兩餐啫，點講都罪不致死啩。

食環署硬係唔肯吸取教訓，今次差啲又搞出人命。鄺先生以死控訴，揭露咗食環署人員嘅涼薄嘴臉。經本報將事件報道，喺輿論壓力下，食環署先至死死氣將啲花還番畀檔主，可惜三成已經殘晒。

更激氣嘅係，食環署仲死撐話冇做錯，只係運用酌情權發番啲沒收嘅貨物，仲話要檢控檔主阻街及無牌經營。唔通真係做官大晒咩，咁嗰啲殘咗嘅花又邊個嚟賠呀？叮！

「好一朵迎春花，人人都愛它」，賣年花將節日嘅歡樂帶畀千家萬戶，但賣花人卻被搞到生不如死，唔通真係冇天理？難怪有議員呼籲政府，畀少少機會業界搵兩餐啦。食環署署長卓永興，你聽到未呀？叮！