今年有關預算案嘅風聲好多，日前仲傳出預算案可能會調高二千萬元及以上豪宅印花稅嘅消息，立法會地產及建造界代表石禮謙（大舊石）聽到呢個消息後激到彈起，尋日猛鬧如果屬實嘅話，諗出呢條屎橋嘅鬍鬚曾係「混帳」，仲批死條屎橋如果可以發揮作用，諗橋嗰個實攞諾貝爾經濟學獎啦！
大舊石尋日同前經濟發展及勞工局局長葉澍堃一齊同傳媒傾偈，本來氣氛好祥和，點知一講起豪宅加印花稅，佢就一輪嘴唔停，又批煲呔曾「戇居」，又批佢嘅曾氏好兄弟鬍鬚曾唔了解市場，加印花稅只係攞中產嚟搞，根本無助遏止樓價上揚。
講完孖曾之後，大舊石又對因馬頭圍道冧樓而成日見報嘅發展局局長林鄭月娥好不滿，話林鄭所謂承擔責任嘅說話係「貓哭老鼠」，仲話林鄭如果真係諗住承擔責任就應該辭職，佢跟住話，前年赤柱塌樹，煲呔曾都搵咗政務司司長唐英年跟進，但牽涉全港四千幾棟建築物同幾十萬市民安全嘅冧樓事件就草草交畀一個局長算數，呢啲叫乜嘢分工呢？