中文大學亞太研究所尋日舉行咗個政制研討會，個會全程講政改方案，但其中一個主角中大政治與行政學系副教授黃偉豪就無喇喇火燒中央政策組首席顧問，黃偉豪總結研討會時，忽然爆咗句，特區政府要搞好政改外，仲要搞好劉兆佳，因為：「佳叔入中央政策組之前成日講管治危機，入咗之後好少講。」
呢句話擺到明係寸佳叔入咗政府，唔再做政府嘅諍友啫，呢番話都可圈可點，事關佳叔昔日係亞太研究所嘅副所長，黃偉豪又同樣係中大學者，咁樣質疑入咗政府八年嘅佳叔收晒聲，真係有啲骨！
一句講晒，佳叔身份唔同咗，唔少學者夠希望佢好似以前咁公開鬧政府啦，只係佳叔到時可能又會畀人鬧反骨，或者呢啲就叫豬八戒照鏡，裏外不是人！
