尋日消委會先為四百期《選擇》切蛋糕慶祝一番，七六年創刊已有份做嘅Connie透露，為《選擇》做過封面嘅藝人包括成龍、張曼玉、王菲等，咁多年嚟可謂紅人無數。呢啲巨星身價嚇人，但消委會就有本事一毛不拔請到佢哋客串，仲要化妝、服裝都自己搞掂。

送一年《選擇》僅值144元

點解明星肯捱義氣呢？一切要由消委會嘅精明始祖開始講，首任總幹事張綠萍係經機會成員麥嘉軒嘅媽咪，又係已故歌星哥哥張國榮嘅家姐。《選擇》創刊時，消委會只係用一般模特兒上鏡，慳水慳力，張綠萍仲搵過佢對孖女出鏡。後尾聽講搵明星做封面本書好賣啲，卒之喺一百一十期時，張綠萍搵細佬、即係哥哥捱義氣，自此開創搵藝人無償出鏡嘅傳統。

消委會唯一嘅回饋就係送番一年免費《選擇》畀佢哋睇，以今時今日嘅成本，即係一百四十四蚊啫。唔講唔知，本書創刊時一蚊本，八十年代賣四個半，家吓十二蚊都維持咗約二十年。

少數唔係明星做封面嘅有八八年嘅一百四十二期，呢期《選擇》以安全套為題，為免敏感，消委會搵咗當年嘅家計會總幹事林貝聿嘉做封面，點知呢期冇明星代言嘅書就因為當年出現安全套滲漏事件好好賣，銷量比平時多咗一倍。