煲呔曾新春期間會向市民發表新年賀辭，今年佢就學人搞搞新意思，搵人製作咗三十秒嘅動畫片，又飛天又遁地咁，據聞呢段片嘅製作費成十萬蚊，值唔值，讀者自己睇啦！不過，立法會議員王國興同李卓人就鬧佢浪費公帑，王國興批評佢冇考慮貧苦老百姓感受，話不如將筆錢幫有需要嘅人好過啦！
煲呔曾呢個賀歲動畫嘅人物有卡通化嘅佢同太太、仲有卡通人物麥兜等，佢哋兩夫妻化身麥兜故事嘅人物宣傳家庭和睦，闔府安康，動畫內容似乎有針對近期多宗家庭悲劇之意。
過去佢嘅新年賀辭只係講幾句說話、拍條片，成本相對低，今次就要花十萬蚊做動畫。咁做同鬍鬚曾喺預算案引入漫畫諮詢一樣，雖然有創意，但效益點樣就見仁見智。