新春到，官場有好多書法能手，運輸及房屋局局長鄭汝樺（Eva）、商務及經濟發展局局長劉吳惠蘭（Rita）同民政事務局副局長許曉暉（Florence）都寫得一手靚字，仲藉揮春向市民拜年。
Eva、Rita等女高官多年前一齊跟名書法家高雲州學習書法，Eva即席寫咗副對聯「紫氣東來福滿堂，紅光日照暖萬家」畀本報讀者，Eva仲借此機會向市民拜年，祝大家安居樂業，身心康泰！
Rita都用楷書寫咗兩對對聯同一個「福」字，一手書法優雅流暢，個「福」字更加蒼勁有力，但佢謙稱寫得麻麻哋，因為高老師中風後，習字已無人督促同提點。Eva準備新年登門探望高老師，做個尊師重道嘅學生。Florence都即席露幾手寫咗個「福」字，又用篆書寫咗「如意吉祥」四個字，雖然擺低咗十幾年，但功架一啲都冇生疏。