小白觀點：唱《歡樂年年》最啱Feel

豪伯首選嘅K場禁歌係《浮誇》呢類走音金曲，對於小白老弟嚟講，實在又冇乜邊首喎，事關天生撞聾，五音不全，我有個老友係醫神超級變態狂迷，係癲到會飛去歐洲追巡迴嗰隻。次次佢一拎起個咪就好似開個唱咁，大班朋友當堂頂唔順，有人捂住耳，有人聽到嘔，最後一定搞到大家一齊群起攻之。

但我又覺得OK喎，因為佢哋忙於爭咪擾攘疏於防範之時，我乘機溝咗壺一比九十九綠茶畀豬朋狗友，自己穿櫃桶飲晒五分四支威士忌，再多幾首仲正！

趁年三十晚，好想唱番首金曲《歡樂年年》同各位讀者大人拜個早年，相信豪伯唔會列入「禁歌」啩。祝煲呔曾虎年碌落台，做生意嘅貨如輪轉，打工仔個個升職加薪出十五個月糧。《任意網為》年初一至年初三收爐，初四啟市，恭喜恭喜。

Blog：sunsiupak@gmail.com

阿豪觀點：《浮誇》走音虐待人

唔講唔知，菲律賓呢幾年嚟淨係因為有人唱英文金曲《My Way》難聽，引起聽眾不滿而鬧出嘅血案，竟然有六宗咁多，搞到當地好多K場索性抽起呢首歌。老實講，豪伯都有切身感受，事關次次唱K，總會有人冇有識死，唱埋晒啲咩《浮誇》一類嘅走音金曲，只能夠講句「貼錢買難受」呀！所以話，唱K呢一種鬥有虐待別人勇氣嘅活動，始終唔係咁啱豪伯。

有人估計，《My Way》之所以經常惹起殺機，係因為歌詞講一個人我行我素，實在太囂張，唔出事至奇。豪伯就覺得咁樣分析，有美化行兇者之嫌喎。

好似幾年前迎月夜香港都發生過BBQ血案，據聞都係因為有人播放老餅金曲而起，唔通就因為咁樣禁播呢批歌咯喎？

Blog：lukchiho75@hotmail.com

網友觀點……

四眼仔：啲阿叔金曲唔係咁多後生識欣賞，加上又長又走音，咪話唔討厭！

Ｋ哥：菲政府應好好教導國民要文明唱K喇。

草食男：菲國女人出國謀生，男人嘆句搵女難，團火就易爆囉！

神父：做乜個世界變成咁暴戾呀！大家不妨唱吓聖詩！