有工開至有飯開，屋企至有家用，幾辛苦都要捱啦，最慘就係，佢哋可能有相當一部分過咗農曆年就打爛飯碗。唔少本港中小型速遞公司近年紛紛北上搵商機，千辛萬苦開拓內地市場，諗住大展拳腳。點知唔好彩，內地舊年十月修訂郵政法例，禁止包括港商在內嘅外商投資經營內地信件速遞業務。

呢鋪認真大劑，原來全港有經營內地業務嘅中小型速遞公司超過兩百間，受新例影響，部分公司可能要炒人，甚至因為撐唔落去要執笠。業界估計，包括本地同內地員工在內，被波及嘅有成十一萬人咁多！

咦，既然涉及喺內地經營業務，兩地咪有個更緊密經貿關係安排，仲有個英文縮寫叫CEPA嘅？使乜搞到畀人趕盡殺絕呀？

叮！講開CEPA呢筆直頭火都嚟埋。原來本應屬於物流業嘅速遞業務根本冇納入在內，如果按新郵政法揸正嚟做，冇得留低。到時好多速遞員因為無其他技能同經驗，無法轉行，只能夠踎街揸兜。

仲有，好多本港企業同內地嘅書信文件往來都依靠港資速遞商提供服務，日後內地企業壟斷市場，呢啲公司可能焗住要捱較高費用，令成本增加，削弱咗競爭力。

但凡吹到神乎其神嘅嘢，多數都係得個講字，皆因港府根本就無心幫企業，更無意協助低下階層打工仔。查實，速遞業界舊年五月起已經多次接觸港府，要求協助爭取將呢個行業納入CEPA，豁免於新郵政法嘅規範。

叮！勢估唔到，半年有多，商務及經濟發展局同工業貿易署只係同業界見過兩次面咁大把，齋噏完之後就當冇事一樣，到依家都未有回音。商務及經濟發展局只係回應話，已經將業界建議交畀內地當局。即係乜都冇做啦！

講真，當局從來都冇好好利用CEPA呢項特殊政策，淨係識攞嚟做騷，除咗吸引愈來愈多內地客訪港之外，點樣協助本港機構同企業打入內地市場，做得少之又少。

淨係聽到港府話協助會計師、律師呢類專業人士北上發展，從未聽過官員講點樣幫速遞員解決就快冇飯開嘅燃眉之急。只識錦上添花，唔會雪中送炭，旨意呢班懶骨頭打救？蚊都瞓啦。叮！