臨近農曆新年，政圈嘅年結活動多籮籮，尋日工聯會會長兼行政會議成員鄭耀棠同理事長吳秋北都同記者聚一聚，透露今年佢哋嘅會員報名人數好理想，舊年年底會員總數已突破三十四萬，估計四月會突破三十五萬，棠哥一邊講仲一邊笑咪咪添。
工聯會早就係香港第一大會，家吓會員人數有三十四萬，等於本港三百四十萬勞動人口中嘅一成，都咪話唔犀利。棠哥話，佢哋正推行普訪計劃，希望接觸一半會員，了解吓佢哋嘅生活近況等，不過職員打電話聯絡會員時，發覺搵人真係唔容易，估計同會員工時過長或者工時顛倒有關。
講完公事後，棠哥都透露，今年會返內地過年，但冇透露去邊。好多香港人北上都打算試吓高鐵嘅速度，棠哥有冇呢個打算呢？佢話自己都計劃去體驗吓，但今次過年就唔會住。