長實執行董事「樓神」趙國雄一向生鬼，尋日長實旗下嘅尖沙咀古蹟活化項目「1881」推出全港獨有嘅光影匯演，樓神戴咗副好特別嘅木框眼鏡喺現場，問起至知呢副眼鏡係佢趁活動未開始嘅空檔，喺「1881」商場嘅溥儀眼鏡旗艦店買嘅，當係新年禮物氹吓自己開心喎！
樓神話佢睇中兩副眼鏡，但心大心細唔知揀邊副好，所以特登戴出嚟畀靚女同事幫手揀吓。問佢呢副係咪近視眼鏡，樓神笑住不置可否，仲好搞笑咁形容：「好似我咁成熟嘅人，梗要一副閱讀眼鏡啦！」哈！大家明啦，係老花眼鏡至真！
溥儀嘅主任Alan透露，樓神嘅新歡係法國老牌子OGA Plus，香港人俗稱「貓嘜」，售價約四千八百蚊，佢嘅特色係全手工打造，襯到個人醒目啲。難怪樓神一見鍾情啦！