政府早前委任做過特首辦主任嘅林煥光做平等機會委員會主席，惹嚟立法會議員開腔狠批重量級公職係前高官俱樂部。尋日議會討論呢個問題時，發言議員卻個個錫住林煥光，反而唔點名斥責離開政府後亂鬧一通嘅前高官。政圈人士質疑呢個冇被點名嘅高官包唔包括前工商及科技局局長王永平呢？
立法會政制及內地事務局會議尋日開會，劉慧卿發言時鬧政府搵前高官做重要公職，但就不忘向坐喺官員席嘅林煥光話：「我唔係話你。」經濟動力嘅「蘇菲」梁劉柔芬接波時，更明讚林煥光有服務精神，「總好過（嗰啲）喺政府時唔做嘢，離開政府又亂鬧一通嘅人……」
邊啲人符合蘇菲暗批嘅條件﹖政圈中人話，近嘅可能係王永平，遠嘅係民主阿婆陳方安生，到底係邊個就要讀者自己意會嘞。不過，從尋日議員嘅言論都可以睇得出，議員對林煥光真係客氣好多。年尾流流，林煥光有呢個禮遇，簡直好似捧盆桔返屋企咁；王永平就似乎要買番棵桃花旺吓至得嘞，起碼整旺啲人緣同人氣吖嘛。