一入侯門深似海，本來係形容啲初歸新抱唔知豪門大家嘅複雜，點知生產力促進局主席陳鎮仁尋日都流露呢股哀怨。佢尋日以破產欠薪保障基金委員會主席身份出嚟見傳媒，但派錯咗生促局嘅卡片，發現之後，佢即刻要收回，仲一肚怨氣咁話唔想要呢張卡片，連派都唔想派。點解？因為做咗呢個位後畀人鬧到一頸血，立法會議員都唔放過佢。陳鎮仁心有戚戚咁話，若果可以唔做，真係想即刻唔做，不過冇得揀吖！
其實，陳鎮仁只係做咗半年主席，但審計署早排發表報告大鬧生促局大花筒亂花公帑，跟住又輪到立法會帳目委員會發表報告，對生促局表示極度遺憾，難怪陳鎮仁有咁嘅諗法。
講番破欠基金主席一職，呢個位到三月尾任期屆滿，政府已連續兩屆委任佢做主席，尋日問佢想唔想繼續做，佢就好婉轉咁話自己好忙，睇怕冇乜時間，叫大家等政府公布喎。