維園年宵花市開鑼幾日，乾貨檔簡直係食腦香港人大晒冷之地，今年年宵貨品以煲呔曾作主題或概念嘅多不勝數，好多貨品仲係由「80後」設計嘅添，由廁紙到燈膽，甚至啤牌都有，據講煲呔曾年三十晚會去行年宵，睇吓佢到時會唔會掃番啲作紀念先！
一班「80後」為煲呔曾設計嘅多項新產品都好過癮，例如「真特首廁紙」咁，每格廁紙就印上煲呔曾卡通肖像，保證唔甩色，啱晒煲呔曾絞腸痧開唔到行政會議時用，夠晒貼身。
另一個潮流話題就係煲呔曾慳電膽醜聞，有大學生設計咗個吹氣慳電膽，煲呔曾搞唔成慳電膽消費券，補番個吹氣慳電膽都唔錯吖！如果唔想望住個慳電膽觸景傷情，佢又可以買副名為「煲呔小心」嘅啤牌返禮賓府，同佢嘅家丁「肥仔」操啤娛樂吓，等肥仔都知道乜嘢叫小心。之但係肥仔放完大假未呢？如果操啤冇腳，煲呔曾買個煲呔形咕
返去，攝高枕頭諗吓退休生活都好喎！