本文重點
農曆新年，政圈人士幾乎個個都要揸番支毛筆演吓嘢，尋日運輸及房屋局局長鄭汝樺（Eva）都唔執輸，一身紅噹噹拜年look走落坪石邨，表面議程係聆聽市民對活化呢條舊邨嘅意見，實則卻係為街坊寫揮春做親民騷。學開書法嘅佢順便一顯功架，一口氣寫足九張，由「龍馬精神」寫到「學業進步」，佢嘅鐵畫銀鈎有板有眼，揮低好多議員。
惹火尤物搞形象工程
高鐵一役後，Eva就變咗惹火尤物，但佢愈戰愈勇，除咗日前喺facebook開網上論壇話要聽公眾意見後，尋日又大搞形象工程，去到坪石邨時即場加演寫揮春。佢一襲鮮紅色外套，配襯珍珠頸鏈，好有節慶拜年feel，屋邨方面都預先準備好文房四寶，等佢喺街坊面前寫揮春，啲居民想要乜嘢，佢就大筆一揮，有求必應，前前後後寫咗九張。雖然佢曾自謙「工作太忙，學書法經常走堂，平均三堂就會走一堂」，但寫字嘅功力卻一啲都唔遜色。