本周初連場大雨，唔少販商都好擔心年宵市場表現，過去兩日轉晴後，佢哋都爭分奪秒忙住做生意，市民亦趁好天去辦年貨，估唔到嘅係高官都趕住做騷。

博上鏡增知名度

鬍鬍曾前日應邀去維園年宵市場一個檔位做主禮嘉賓，但佢嘅架勢太大，警方又出動十幾二十個軍裝加便裝警員重重護衞，結果一行人喺維園裏邊好似捲起旋風咁，畀人鬧阻住地球轉；之後輪到主管就業嘅張建宗落去鼓勵人哋創業，雖然佢有份喺年宵市場消費，但行程仍喺擠迫嘅維園引嚟唔少關注。

尋日年廿七，維園年宵市場更加熱鬧，有團體搞咗個年宵小老闆計劃，民政事務局副局長許曉暉同勞工處處長謝凌潔貞等又落去，本來仲有教育局副局長陳維安份，但佢臨時唔得閒放咗飛機。佢哋一堆人傍晚時分湧落維園，除聽啲團體介紹外，又寫揮春、影大合照，搞咗一輪先散去。

早喺年宵首日，許曉暉已經落過去社會企業攤檔，事先仲幫襯咗八千蚊，尋日佢又再使三百蚊買咗個福袋。掏荷包之外，兩名女將仲即場寫揮春趁機宣傳一番，年宵市場變咗高官嘅抽水站。呢班高官咁勤力落去維園，都係想多啲上鏡、增加知名度啫，但有冇人理會維園亂上加亂呢？