小白觀點：為避淫警走夾唔抖
長沙灣警署有隻警犬可以跨過八呎高欄，可以講得上係狗界欄王。照計受過訓練，連賊佬開槍聲都唔怕，因乜事一聲雷就嚇到走夾唔抖？唔通佢覺得最安全嘅警署反而係最危險，驚淫警連警犬同袍都唔放過？
不過今次警隊嘅處理手法認真唔掂，走甩咗警犬有乜大不了？犯人得兩隻腳都試過走甩唔少次啦，何況狗有四隻腳？最奇怪嘅係，其實警隊可以家醜不出外傳o架。港產片《PTU》入面咪有個肥探員唔見咗支槍嘅，佢都係一邊叫人搵槍，一邊去模型舖買支頂檔啦。
同一道理，唔見警犬一樣可以邊搵狗邊裝假狗。冇錯，要臨時臨急買隻瑪蓮萊犬可能唔係咁易，大可求其搵隻好普通嘅金毛尋回，噴到成身啡色，再髹黑個嘴，特警成唔講，領犬員唔講，斷估假狗唔會自己爆響口啩？
e-mail：sunsiupak@gmail.com
Blog：http://sunsiupak.blogspot.com
阿豪觀點：揭竿上街爭取加餸
警署走犯雖然少見啲，但都唔算係咩大新聞，長沙灣警署最近走狗，都算係一單幾過癮嘅事。雖然呢隻警犬叫「奀豬」，但竟然可以一嘢跳過八呎高嘅欄，堪稱警犬界劉翔。
點解警犬無啦啦會開小差呢？據聞話聽到一聲春雷，當堂驚惶失措，先至會走咗去。其實都唔怪得「奀豬」冇用嘅，帶住佢哋嘅差大哥都未必好得好多o架咋，有個畀個弱女子摑一巴，都即刻「累」低啦，隻狗仔細膽少少都無可厚非。
話時話，我就唔係好信呢個解釋嘞。豪伯估計，呢次好可能係警犬嘅一場抗爭行動！警察爭取薪酬福利，都會上街遊行示威啦，家陣冇聽講過警犬有一個「狗糧趨勢調查委員會」，加上又冇「警犬工會」，呢班公僕嘅膳食同福利咁多年嚟有冇改善天曉得，「奀豬」揭竿上街等大家有餸加，簡直係警犬界嘅英雄。
e-mail：lukchiho75@hotmail.com
Blog：http://lukchiho.blogspot.com
網友觀點……
森森：一定係上帝雷打呼喚神犬！
神經佬：莫非做條流浪狗好過當差？
Ken：好鬼騎呢，連警犬都要大逃亡，呢個特區政府真係！
公孫先生：十足冇掩狗籠來去自如，數真啲多咗隻自來狗都唔奇呀！
八哥：咁精彩神奇嘅警犬跨欄，《警訊》有冇得睇番？
有料爆
狗仔隊之王過世，狗仔認真流年不利呀！
SMS傾埋一份：6016 2496