可惜市民一點一滴慳慳埋埋，都唔夠政府嘥。講出嚟嚇你一跳，每年供應本港嘅東江水，有兩成以上因爆水管白白流失，每年浪費六億幾元，水務署署長馬利德實在難辭其咎。

話口未完，香港仔黃竹坑道尋日又爆水管嘞，一條直徑六百毫米嘅地下食水管突然爆裂，大量清水好似噴泉咁湧出嚟，浸咗四條行車線，現場交通大癱瘓，車龍超過兩公里。

本來，對香港市民嚟講，爆水管早就唔係乜嘢新鮮事，不過以前隔好耐先至爆一次，家陣咯喎，如果有一排冇爆水管嘅消息，大家反而覺得唔習慣。不妨睇吓近排嘅紀錄：

去年八月底，灣仔一條水管爆裂，令港島交通大癱瘓。今年一月初，元朗一條直徑八百毫米嘅地下食水管又突然爆裂，射出嘅水柱三十米咁高，連渠蓋都唔知沖咗去邊。過咗只係一個月，又輪到黃竹坑中招。其實，近年幾乎係日日有水管爆裂，○七至○八年度發生咗一千八百一十六單，平均每日超過五單，出事地點遍布港九新界，簡直遍地開花。

實際上，水管爆裂嘅原因並唔複雜，就係老化。香港話就話係個現代化都市，勢估唔到，供水系統竟然破舊不堪。現時鋪設嘅大多數係鐵水管，使用壽命二十五年，但係有三千公里嘅水管已經用咗超過三十年，其中一成更處於高危狀態，分分鐘會爆裂。

最弊嘅係，水務署班官老爺又唔嗲唔吊，平時唔認真檢查保養，到爆水管先至做檢驗騷。不妨咁樣打個比方，香港嘅供水網絡係一個周身病嘅老人，而服侍佢嘅護士又懶懶閒，病人唔辛苦到叫救命都唔理，老人家有乜法子唔喊苦喊忽。

水管狂爆，市民勁批，水務署先至死死氣話更換水管計劃可以提前完成，不過都要等到二○一五年至完工。即係話，喺未來幾年，香港人仲要隨時受地下水柱襲擊，香港嘅馬路仲隨時會變河流，香港嘅交通隨時會七國咁亂。

最搞笑嘅係，每次發生爆水管事件，水務署就實牙實齒應承加快更換水管進度，不過都係齋噏，有冇加快，加快咗幾多，只有佢哋至知。

叮佢個鎯鎯，香港假假地都叫做國際都會，家陣咁嘅環境，咪等於趕客。計太一叮話齋，不如將計就計，喺馬路邊裝上彩色射燈，加上勁爆音樂，第日一爆水管，就變成音樂噴泉。水漫香江、仙樂飄飄嘅奇觀，實令遊客樂而忘返。