一眾區議員尋日中午相約去灣仔開餐，而身兼沙田區議員嘅林大輝仲係唯一一位立法會議員添。飯敍傾啲乜？眾人事後三緘其口。咁啱得咁蹺，席上仲有一位稀客，就係中聯辦社工部部長張鐵夫嘞，莫非佢嚟收風？
與會嘅沙田區議員湯寶珍透露，餐飯有二十幾人應約，包括部分區議員同其朋友。聽落相當齊腳，如果唔係有重大議題，好難叫齊咁多人噃！但佢話席間只係天南地北講吓城中熱話，冇講五區請辭後嘅補選問題。其實補選問題已燒埋身，隻字不提又認真奇喎！
有份飯敍嘅仲有曾講過有意參加補選嘅新論壇成員龐愛蘭，咁依家點呢？佢輕描淡寫咁話，若然呢次真係一場補選，會考慮參加喎。依家中央唔認呢場係補選，煲呔曾都話唔去投票，睇嚟佢唔參選嘅機會都好大。