09/02/2010

播放本新聞相關短片

政情:方剛派揮春被讚靚仔

仲有唔夠一個禮拜就到農曆新年,立法會批發及零售界議員方剛尋日搶先同商販拜個早年。

尋日朝早十一點幾,方剛攞住大疊紅噹噹嘅揮春現身灣仔太原街市集,商販見有好意頭,揮春攞完一張又一張,就連買緊餸嘅街坊都嚟趁熱鬧,有啲商販仲讚方剛靚仔有型添!

見熱情難卻,方剛派到滿面汗珠依然未停手,仲主動走近售賣賀年糖果嘅攤檔,一口氣掃咗十幾包花生糖同炸角仔,話要同商販打氣,之後搭「叮叮」直踩銅鑼灣渣甸坊繼續派。

經濟漸見復甦,但方剛話今年受各國部署退市影響,營商環境仍然艱難,提醒小商戶量力而為,千祈咪過度借貸。咁農曆新年去邊度玩呀?方剛話會留港陪伴年邁嘅母親,為佢預備豐富齋菜做團年飯,認真孝順。