09/02/2010

播放本新聞相關短片

政情:龔家同好友員工搞春茗

華懋慈善基金會喺世紀爭產案中獲得初步勝利後,當日龔家佔大份股份嘅上市公司安寧控股第一時間勁升逾兩成贈興。連日嚟龔家心情絕靚,尋晚同龔家好友以及安寧員工,仲喺安寧旗下嘅顯達鄉村俱樂部搞春茗聚餐添。

尋晚大約七點,龔仁心妹妹龔因心率先坐七人車到場。約七點半,一直立場鮮明支持龔家、身為安寧獨立非執董嘅趙世曾同一對仔女到埗。問趙世曾新年有咩願望,佢笑笑口咁話雖然依家爭產官司已完咗九成,但希望成件事快啲完結。

二十分鐘後,龔仁心夫婦坐豐田七人車嚟到,佢見到在場傳媒都有揮手致意,睇到佢神色輕鬆晒。

晚宴歷時約三粒鐘,龔仁心夫婦同趙世曾一家喺十點十五分離開,龔仁心走時不忘同傳媒再打個招呼,但冇停落嚟講嘢。趙世曾就話同安寧同事一齊團年好開心,魚、菜、乳豬樣樣齊,仲有歌舞助興,又有現金大抽獎,佢都有落場跳番隻舞,但頭獎現金三千蚊,佢就抽唔到嘞!