09/02/2010

播放本新聞相關短片

政情:林健鋒拋橋防雙底衰退

仲記得煲呔曾舊年底上京述職期間,又再危言聳聽話香港今年中或會出現「雙底衰退」,點知話聲一落,嚟自各界嘅反駁聲不絕於耳,擺明係鬧佢好似山草藥咁噏得就噏。

尋日見到經濟動力嘅立法會議員Jeffrey林健鋒,問起點睇煲呔曾嘅「雙底衰退」論,佢即刻話有大把嘢講。話說前年刮起金融海嘯後,政府推出幾項刺激措施,例如Jeffrey都有份力爭嘅中小企特別信貸保證計劃,由政府做擔保,銀行借錢畀中小企,仲有當時由佢做諮詢委員會主席嘅香港出口信用保險局,提高出口保障,結果總算幫中小企度過一劫。

Jeffrey認為只要政府做好啲刺激措施,唔好急於退市,相信雙底衰退出現嘅機會唔大。都講得好白啦,明顯係話政府做得唔夠,叫煲呔曾咪淨係齋噏,做多啲實事去刺激經濟咪可以頂住跌勢囉!

其實,Jeffrey一直都希望今年六月底結束嘅特別信貸保證計劃可以延長,所以佢嘅講法,無疑係叫煲呔曾嘅「親兄弟」財爺鬍鬚曾喺月底發表嗰份新嘅預算案要有好消息。