嗰個攤位係由社聯幫手投得，由四間社企單位合作營運，其中由明愛天糧出產嘅「虎步開財路賀年曲奇」非常好賣，入面好得意嘅「虎掌」形狀曲奇仲深得Florence歡心添。Florence透露今日嚟之前已自掏腰包用八千蚊買咗一百盒曲奇禮盒，諗住新年用嚟拜年，仲話有信心清得晒所有貨喎。

近期facebook熱爆政界，兼被視為官民直接溝通嘅新橋樑，Florence當然唔執輸，早前都開咗個facebook戶口。驟眼睇佢個facebook都幾熱鬧，有人讚佢回覆得快，誠意可嘉，亦有人轟佢似做政治Show多啲。不過最搞笑嘅，係有人話佢唔應該大大隻字話自己係許曉暉，應該開個虛構人物嘅Account，好似古時嘅皇帝微服出巡咁，先可以真正試探民情喎。