09/02/2010

播放本新聞相關短片

政情:煲呔曾朝思暮想等退休

雀枱上有一個術語叫「棄胡」,即係評估形勢覺得冇胡食,不如唔輸當贏,不求進取,只求摸完鋪牌打和就算。依家煲呔曾就係以呢種消極嘅棄胡心態打特區管治呢鋪牌,不思進取,但求每日餵吓錦鯉、吹吓口哨,或者同「80後」燒吓烤,悠悠閒閒過埋未來呢兩年半就埋單走人。而佢呢種諗法,尋日喺一份報章嘅專訪中表露無遺。

煲呔曾喺訪問中講,每日朝早都諗緊退休,而卸任嘅佢有可能會離開香港一段日子。記者問佢有冇諗過卸任後,會同老董一樣去做全國政協副主席嘅?佢冇否認,只係叫大家唔好咁多揣測。真係鬼拍後尾枕,寥寥幾句真心話,將煲呔曾一直隱藏喺心中陰暗角落嘅諗法,全部抖晒出嚟。不過有冇得做全國政協副主席,真係天曉得囉!

香港政局紛亂,貧富懸殊愈嚟愈嚴重,經濟轉型又仲未成功,煲呔曾身為特區最高負責人,唔係日夜諗辦法解決,而係朝思暮想諗退休,佢都真係得囉。

但掉轉嚟諗,佢管治差劣,如果真係願意翹埋雙手,唔搵香港較飛,可能反而係港人之福,既然佢依家有退休心願,惟有預祝佢退休生活富貴吉祥,日日歎奶茶王、夜夜食煲仔飯,同埋提醒佢記得買相機連長鏡頭,事關冇咗官銜,以後再去南生圍影雀仔,就唔可以問政府新聞處借鏡頭o架喇。