福爾摩詹直指補選經費話晒係納稅人嘅錢，立法會有職責同權力去決定點處理，但依家政府將筆撥款同預算案綑綁埋一齊表決，咁做就唔啱嘞，若果係一個負責任同有信心嘅政府，唔應該逼啲議員拖住一齊過，咁樣逼人通過，就好似預算案未出已經買定保險，證明政府缺乏信心。

承認「公投」合法唔多妥

佢仲話，中央已經表態話泛民所謂嘅變相「公投」係違憲違法，特區政府咁做即係承認呢個變相「公投」嘅補選係合法，咁做認真唔妥。

相信大家都知道，財爺鬍鬚曾呢幾年假借預算案諮詢之名，大灑公帑為自己做形象工程，畀議員鬧爆之外，出到嚟嘅預算案亦劣評如潮，泛民主派年年都反對，搞到預算案要靠建制派護航以低票通過，好唔光彩。

鬍鬚曾之前大玩狼來了，話財政赤字有近四百億元，早前又改口風話今年財政有改善，但前日又明言唔派糖，擺明又係要壓低市民嘅期望，咁泛民主派必定又對預算案投反對票。但係依家將補選撥款同預算案綑綁，形勢就會逆轉，事關為咗可以進行補選，泛民必定要支持預算案。

聽福爾摩詹咁講，根本就係踢爆鬍鬚曾又想用公帑為自己谷民望，故意將補選撥款項目加入預算案，無非係想挾一億六千萬元補選經費，威脅泛民乖乖就範，送上佢哋手中一票。

預算案未出台，鬍鬚曾就買定保險，出招箍票，以防反對票創新紀錄，睇嚟市民對呢份預算案都唔使抱咁大期望囉。