小白觀點

草食男有苦衷

唔係鄭汝樺局長出嚟玩facebook都唔知，原來咁多假官喺網上招搖撞騙。其實網絡世界認真靠唔住，有調查發現多咗好多「肉食女」會喺網上主動出擊，其中有個中女分享經驗，話本來同男網友喺facebook都好好傾，點知約到出嚟見面，嗰條仔好被動兼粒聲唔出，埋怨香港「草食男」何其多。

唉，查實邊有咁多「草食男」吖，食草男、索K男就大把，男網友出嚟唔飛擒大咬，由麥記吹水開始，到公園殘廁胡作非為終結，一定事有蹺蹊，九成九係個傻仔喺facebook見到女網友張玉照，明明係翻版林莉、正版志玲姐咁樣，腿長連1024顯示都裝唔晒，心口仲要有一大個Y字，點知出到嚟一見，哇！成個長沙馬王堆辛追古屍咁款，梗係當堂嚇呆出唔到聲啦。議員真係要運用特權法，調查吓港女網上推銷時有冇失當同埋誤導呀！

阿豪觀點

假局長更親民

吖，唔知啲人係咪睇咗小白兄嗰篇「教我如何add鄭汝樺」專欄文章呢？依家一係唔嚟，一嚟就嚟七個鄭汝樺，真係add到手軟。

當然啦，鄭汝樺以為facebook有開關掣，又點會真係開個account呀？不過原來除咗鄭汝樺，仲有好多司局長被惡搞，最多冒牌貨就係鬍鬚曾。哈，唔知佢應該覺得嬲吖，抑或乘機用嚟吹噓自己多年輕人識呢可？

又真係估唔到，明明呢幾位「鄭汝樺」嘅profile擺到明係玩嘢㗎啦，點知都有大批議員政客中招，唔知佢哋第時點教啲街坊防範寶藥黨等騙徒呢？

不過又講番轉頭，班「苦主」都算係咁，起碼唔會去法庭告對方欺詐，嗰位「做到最好」嘅議員仲促請各高官盡快設立官方facebook帳戶同年輕人溝通，吸納同疏導佢哋嘅意見。好心真鄭汝樺向A貨學吓嘢，廣交天下朋友啦！

網友觀點...

海公公：啲冒牌貨都有心思誠意，正貨就反而欠奉！

c+：冒牌鄭汝樺比起正貨更加聽到民意。

吉田：facebook真係靠唔住，所以小白重開個Blog係明智決定。

李伯：咁多流嘢，豪伯同小白個facebook都唔知係咪冒牌……