本港唔少康樂設施都設喺屋邨入面，好多因為日久失修唔用得。但負責屋邨管理嘅領匯根本冇心改善，維修工程拖得就拖。領匯曾被踢爆違反公契，多個商場同停車場天台嘅康樂設施未有開放，佢哋實牙實齒應承立法會舊年年底重開十九個呢類設施。

點知領匯又係「加租快，改善慢」嘅一貫作風。依家一○年都過咗個幾月啦，承諾重開嘅康樂設施入面，只有啱啱過半，即係有十個完成修葺工程之後重開，包括一個平台花園、兩個網球場、一個籃球場同一個羽毛球場等。剩低嗰九個，包括三個籃球場、一個羽毛球場同三個網球場等，仲做緊工程，要到今年四、五月至搞得掂。

有足球訓練學校租用樂富邨一個停車場嘅天台做訓練場地，但場地遲遲未能啟用。校方每月要白支幾萬蚊教練費，你話係咪靠害吖！

領匯管理大部分公共屋邨商場同停車場，咁大間公司，應該牙齒當金使至啱數㗎，居然講話唔算數，應承做嘅嘢，到限期只交得一半貨，正如有立法會議員話齋，簡直係無法無天。而房屋署作為地契嘅執行人，居然翹埋雙手，理都唔理，縱容領匯拖延工程，更加係嚴重失職。

叮！修葺康樂設施唔係乜嘢高科技，有幾複雜吖？咁都要拖幾個月，證明領匯根本就冇心盡快搞掂，等市民早啲可以使用設施鍛煉身體。

講真，領匯自從接手公共屋邨商場同停車場管理之後，將市民利益放兩邊，利字當頭擺中間，有邊樣唔係先講錢㗎？有得賺嘅，一定會拿拿臨搞掂；要攞錢出嚟益市民嘅，譬如維修康樂設施咁，一於拖得幾耐算幾耐。

呢嗱，青衣長亨商場早喺房署年代已經決定加建升降機，領匯接手管理後，同房署不斷「扯貓尾」，冇人願意負責，加建工程拖足七年，一直開工無期。依家架喺上落貨高峰期，經常爭到打崩頭，唔少老人家冇辦法同人爭，惟有日日撐成百級樓梯上落，真係冇陰功咯。

領匯有時又好有效率㗎，佢哋改建屋邨商場然後瘋狂加租，直頭有咁快得咁快。一搞掂，閒閒地加租幾成，賺到盆滿缽滿。呢嗱，領匯舊年嘅中期業績逆市狂賺，金融海嘯咁嚴重，呢間公司一枝獨秀，咪全靠為富不仁、搏命加租囉。

計太一叮話齋，如果領匯改善服務質素嘅積極性有加租一半咁多，如果房署仲記得自己食嘅係納稅人俸祿，十九個屋邨商場同停車場康樂設施嘅修葺工程，早就已經搞掂晒啦。叮！