尋日見到青年事務委員會主席陳振彬，當然問吓呢個「老化」現象啦！佢話嗰三個「80後」嘅委員已經全部入咗同青年直接接觸嘅國際交流及會議工作小組，等委員會可以隨時知道青年嘅最新動向。

佢仲解釋，委員會仲有另外三個工作小組嘅主事人都唔後生，因為呢啲工作小組係關於撥款申請、調查研究同國民教育，小組成員主要係專業人士同學者，要有一定歷練同人生經驗，另外仲有青年制服團隊嘅領袖，呢班人雖然唔係十八、廿二，但委員會會定時會見唔同青年組織聽取意見，所以唔怕有代溝。換言之，委員應該係要搵啱人亦要啱做嗰個位先得，唔可用年齡界定，亦唔好有年齡歧視啦！

講開「80後」，近日因圍堵立法會事件，佢認為港人一向尊重各方面訴求，但佢覺得表達訴求時最重要係有規有矩，要識得互相尊重先可以講自由喎！