鬍鬚曾話覺得用「派糖」一詞唔夠謙，而且一講到「派糖」，市民就會集中討論有糖定冇糖呢個問題，而每項措施總會有人受惠唔到，所以推出紓困措施同時衍生「N無」問題，即推五項措施社會就出現「五無」人士，推七項措施就有「七無」喎。鬍鬚曾施政失當搞到民怨四起，但佢依家好似講到民怨係源於弱勢社群要求多，呢招偷換概念唔通要為嚟緊嘅預算案再次漠視「N無」人士打定底？

賴市民理解成利益輸送

佢又話「派糖」語意不清，市民會將有關措施理解成一種利益輸送，搞到人人喺受惠與否嘅問題上打轉，結果未能受惠嘅市民會憤憤不平，取得好處嘅市民就認為自己應該得到更多。

佢講咁多，無非係想話畀大家知社會政策難以做到面面俱圓，暗示社會出現「三無」、「五無」係可避免，之後仲自我感覺良好，力陳過去兩份預算案有乜利民紓困措施得到國際貨幣基金認同。

鬍鬚曾竟然將生活於水深火熱，連開飯、住屋都成問題嘅「三無」、「五無」人士上綱上線講成「N無」，搞到公眾有一個印象係呢班人貪得無厭，政府無論推幾多惠民德政都滿足唔到。

咁擺明佢係推卸責任，反屈弱勢社群要求多，根本冇心解決呢個棘手問題。