相信好多人都明白，今次冧樓事故係因為樓宇長期無好好維修所致，加上大部分舊樓都冇成立業主立案法團，要組織所有業主一齊夾錢做維修就難上加難，所以政府如果真係唔想同類事件再發生，除要加快驗樓程序，首要任務就係幫業主組成法團。

唔少立法會議員都炮轟民政事務局協助舊樓業主成立法團不力，安置災民等善後工作又做得差，相信再睇埋德成局長仲好意思讚自己，真係火都嚟埋。

淨識卸膊當自己隱形

不過，最令人氣憤嘅並唔係德成局長讚自己應變能力強，而係佢有意無意將自己當隱形，好似講到冧樓其實唔關自己事咁。佢喺文中引咗個小故事，講述兩個經歷冧樓事故災民嘅互動情況，形容今次居民喺危急關頭嘅互助行動，係令事故嘅傷亡人數減到最低嘅原因。

洋洋灑灑寫咗成千字，但佢對民政局點檢討今次善後工作嘅不足就隻字不提，又冇講點樣喺預防方面做多啲工夫，反而仲喺文末發表結論話，因為市民有互相關愛嘅精神，所以就算佢冇辦法消除災難，都有能力去應付不幸喎。

言下之意，即係就算下次再有意外發生，佢都覺得自己有能力搞得掂，而到底事前點去做預防工作就同佢冇關。到底佢明唔明白「預防勝於治療」呢六個字，依家首要任務係要防止不幸事件再出現，佢係咁卸膊，到底有冇考慮過一個局長應有嘅承擔呢？