小白觀點：篤眼篤鼻唔聚財
facebook無遠弗屆，連最白癡、最不知人間何世嘅高官都要搵佢過橋扮親民，就知佢嘅威力。不過今次facebook為賀壽改新版，就搞到好多人媽媽聲，新版面又確係篤眼篤鼻，硬係好似唔聚財咁，有人仲發起反新版群組添。
講真吖，facebook新版係唔多妥，但鬼叫佢依家時來運到，況且人哋又冇喺你荷包攞六百億，又冇人拎支槍指住唔玩唔得，大家將將就就忍吓啦。正所謂十年河東十年河西，網絡從來冇長久嘅超級霸權，如果真係唔滿意嘅，夠創意都可以學都唔返，整番個叫ashole頂冧佢o架。
大家唔好心邪，呢個係ash煙灰同埋hole窿夾埋，唔好睇少呢兩個字，當中蘊藏住好深層嘅意義，代表咗人與人之間關係嘅冷漠，好似煙灰跌落無底洞嗰種無奈呀！唔係講笑，我覺得有得搞囉。
e-mail：sunsiupak@gmail.com
Blog：http://sunsiupak.blogspot.com
阿豪觀點：搵嘢嚟搞冇咁悶
facebook六歲生日，搞搞新意思，上個月底以全新版面示人，更新版面同私隱設定，版面除被簡化，仲設有搜尋欄，群組等項目則被置於左側。不過好似唔係個個都咁受落喎，有人甚至發起群組反對添。吖，唔知應該話facebook太深入民心，大家對佢太有感情，抑或係話佢好搞唔搞捉蟲呢？
其實版面嘅嘢係好閒啫，用用吓自然會慣，點解facebook係都要搞一搞佢呢？咁又難怪嘅，有電腦專家發現，對大部分人嚟講，更新facebook已經成為一件冗長乏味嘅事，大家開始唔係咁理其他人上載嘅資訊，甚至一副「唔好再煩我」嘅嘴臉。
或者因為咁，依家成日無啦啦有訊息話facebook要收錢，facebook要乜乜要物物，雖然有關方面已經澄清過，但有人講始終好過冇人講，起碼冇咁易被人厭倦呀嘛。
e-mail：lukchiho75@hotmail.com
Blog：http://lukchiho.blogspot.com
網友觀點……
Peter Pan：其實改得都唔差呀，總好過冇朋友。
zizi：搵啲咁嘅嘢搞，誓死反對！
小文：我決定唔再玩facebook……一日咁多啦！
Quine：改番玩ICQ先，但啲朋友好似唔見晒！
CK：冇計啦，鬼叫依家blog又out咗，twitter又唔流行，惟有繼續玩啦！
有料爆
依家香港愈來愈多肉食女，小心！
SMS傾埋一份：6016 2496