尋日係罹難者「頭七」，發展局局長林鄭月娥一身黑色套裝上立法會，連講話都好似喊咁聲，簡直襯到絕。但係講嘅嘢就九唔搭八，如果死者泉下有知，睇怕都幾難安息。

林鄭月娥話，對冧樓造成人命傷亡非常難過，又感慨當局努力咁多年，本港樓宇安全意識依然薄弱，仲話政府要更齊心、更有決心，佢樂意統籌各部門解決舊樓安全問題喎。

點解搞到死人冧樓咁大劑？林鄭月娥話事件甚為罕見，原因有待調查，希望公眾喺真相未查明之前，唔好妄自揣測，質疑係政府監管工作粗疏引起。

叮！唔知呢位問責局長啲眼淚係為死者感到難過吖，定係為政府感到「冤屈」呢？林鄭月娥自己都話，住喺失修舊樓嘅係社會最弱勢社群，舊樓失修已經成為社會問題。樓宇結構安全關乎人命，監管責任政府唔孭，唔通要住喺入面啲窮人自己孭？

發生慘劇之後，屋宇署係威係勢出動四十隊人手，話一個月內要檢查晒全港四千幾幢五十年樓齡以上嘅樓宇。頭兩日檢查咗三百六十幾幢，未發現有即時危險，但大約一成要發出修葺令。

講開修葺令認真搞笑。呢，土瓜灣有幢樓齡超過五十年嘅唐樓收到屋宇署修葺令，上月尾請人開工，點知承建商開工幾日突然劈炮，寧願蝕埋搭棚費同工程費都唔肯做落去。有業主引述師傅話，幢樓實在太殘舊，「擺多兩三年隨時冧」。

叮！舊樓修無可修，隨時冧得，屋宇署居然淨係派張修葺令就算數。修唔修冇人跟進，修成點同樣關人個關。當局咁嘅「監管」，唔爆大鑊至奇。有議員批評，「國際都會」竟然冧樓死人，成個香港都蒙羞。講真，港府點止羞恥，直頭草菅人命啦。如果監管到位，及早發現問題，意外有可能避免，四名市民點會死得不明不白？呢個政府簡直係無可救藥。

講真，舊樓安全問題積重難返，小打小鬧，淨係靠檢驗維修，根本解決唔到問題。除咗加強監管，加快市區重建同樣重要，嗰啲修番都嘥銀紙嘅樓，有必要納入重建計劃。至弊市區重建局選擇項目嘅優先次序係睇發展潛力，而唔係樓宇殘破程度同樓齡，冇「水位」嘅根本唔會考慮。好似土瓜灣呢啲弱勢社群集中嘅地區，有排都未輪到啦。

計太一叮話齋，如果當局唔引入新思維，繼續墨守陳規，舊樓安全永遠離唔開「檢驗—發修葺令—一切照舊—冧樓死人」嘅惡性循環，類似慘劇只會不斷重演。叮！