環保署高官一擔擔

澳洲有個電視直播節目，受訪者喺自己公司接受訪問，後面有一大班員工懶勤力咁做嘢，呢啲咁嘅格局，香港嘅晨早新聞節目經常都有啦，本來冇乜特別。

最正嘅係睇到大約1:07左右，受訪者左邊膊頭有條友背住鏡頭鬼鬼祟祟咁左望右望，睇住佢開完一張半裸靚女相，又開第二張，睇咗幾張之後，突然知道大劑，記起後面嘅老細喺度玩直播，當堂斷到正。

老實講，我唔覺得喺公司睇鹹嘢有乜唔啱啫，唔通喺屋企同埋一家大細、四代同堂一齊睇咁溫馨咩，之前環保署有件高官都係咁啦，只要唔整污糟Keyboard要阿姐抹，其實問題不大。反而有好嘢一齊分享，可以增加員工歸屬感添，今次呢位仁兄畀人拍到，大條道理反過頭嚟告間公司侵犯個人私隱都得呀！

睇閒嘢唔該醒少少

今次同大家介紹一段正短片，鏡頭影住澳洲一間電視台直播某銀行個人理財顧問講嘢，點知後面有人上網瀏覽名模Miranda Kerr嘅性感相，銀行話會嚴肅追究喎……

嗱，我哋呢個欄目開宗明義叫做「任意網為」，當然唔反對打工仔女用辦公室嘅閒暇時間上網輕鬆吓啦，但係「任意網為」同任意妄為絕對係兩回事，呢段短片嗰位仁兄肯定係反面教材！

首先，睇閒嘢都要睇得有技巧啲啦，梗要望清楚周圍環境，好似話有冇鏡呀？有冇人拍緊嘢呀咁啦。第二就係千祈唔好睇相啦，大家要睇養眼相，好心唔好慳嗰幾蚊買份報紙啦！如果睇八卦新聞，遠望埋去都係一堆文字，冇咁易穿崩嘛。唔講咁多喇，去片先。http://www.youtube.com/

watch?v=v1m8a4J14ZI

網友觀點……

SW：工作壓力大，梗係要睇吓艷照紓緩壓力啦！

盲蟲：真係死蠢，睇鹹嘢都唔醒水少少，一眼關七嘛！

陸克文：證明佢工作效率高，有好多空閒時間。

客迭：呢條友上埋電視可謂斷正，炒梗喇啩……