「鋼琴王子」李雲迪今明兩日舉行音樂會，喺下個禮拜一仲有一場獨奏會，佢尋日中午由北京抵港，一落機就即刻趕到文化中心同指揮見面開會綵排，跟住舉行記招，然後同近千個鋼琴師生開「鋼琴大師班」，接住再做外國電視台訪問，行情密質質。
雖然全日都冇粒米落肚，但佢仍展現一貫親切笑容話唔辛苦，事關今次返港覺得大家對古典音樂嘅投入更多，感受到大家好想去了解古典音樂嘅熱情，所以開心到唔記得攰。
為咗等學生可近距離受教，大會特別安排咗兩個學生上台彈畀佢聽，等佢即場指導佢哋。機會咁難得，就連大導王家衛位公子都想嚟畀佢指點下，但實在太多人報名，佢哋最後都結唔到師徒緣。
喺記者會仲有個「特別嘉賓」，就係李雲迪嘅蠟像嘞。雖然個蠟像做起好耐，但佢話今次都係第一次見，所以睇到都好驚喜，不過佢覺得對眼好有外國人feel，唔係好似自己，但頭髮同手就似到十足十，嗰時用咗成兩個鐘嚟「度身」都係值得嘅。