05/02/2010

播放本新聞相關短片

政情:CY拋出矛盾冇計解決

一向鍾意同煲呔曾唱對台嘅行政會議召集人CY梁振英,尋日出席社聯主辦嘅展望預算案研討會時又再大談貧窮問題,佢話香港嘅貧窮問題特殊,其他有類似問題嘅國家,係中上層收入增長快,基層增長慢,形成貧窮問題,但香港嘅基層則係收入下跌,貧富差距不斷擴大,CY話呢種現象叫「生產與分配矛盾」,即社會大量製造財富,但基層完全分享唔到,呢樣就係香港其中一個深層次矛盾嘞。

CY舉例話,今年經濟唔算特別差,香港總商會仍然要求預算案減利得稅,只會加深呢種矛盾,呼籲總商會應該從社會同政治角度諗多啲。而香港成日有人批評官商勾結,有反商情緒,其實正正就係由呢種生產與分配矛盾造成咁話。

中央三令五申叫煲呔曾解決香港深層次矛盾,但佢就一籌莫展,連何謂深層次矛盾都未搞得清楚,一時話純屬經濟矛盾,一時又話經濟、政治同民生都包涵在內,隨風擺柳,取巧投機,CY依家落足心機解構深層次矛盾,唔通想將煲呔曾比下去?但無論CY解構嘅深層次矛盾係咪真確,佢同煲呔曾都一樣,只係識提問題,唔識畀答案,諗唔出令人拍掌叫好嘅解決方案,CY係咪應該首先解決咗自己呢個矛盾先呢?