本文重點
呢排樓價節節飆升，連做女醫生嘅都要打電話上電台「烽煙」節目發牢騷，投訴買唔到樓。立法會地產及建造界議員「大舊石」石禮謙（圖）教路，小業主首次置業可以選擇價錢較平嘅二手樓或居屋，又讚房協嘅出品都唔錯，仲醒條貼士畀大家，話如果有心買居屋，最好揀九五年同九六年興建嘅二手居屋，質素最正，事關當時樓市仲未好熾熱，喺嗰段時間興建嘅樓宇最有「誠意」，絕對買得過。
大舊石仲猛幫業界賣廣告，話買樓好過買股票喎。佢話年輕人買樓有兩大好處，第一，對事業有幫助，一諗到自己要供樓十幾、二十年，一定畀心機返工，唔會郁啲就辭職唔做，半途而廢；第二，防止自己變購物狂，事關個個月攞咗大半個月糧供樓，女士們買鞋、買手袋都會諗吓先，唔敢亂使錢。
斬手指唔再買股票
佢仲自爆後生時試過攞囡囡嘅利是錢去買股票，自己又夾咗少少錢，諗住等佢慢慢滾大，點知有一次遇到大教訓，勁蝕離場，從此斬手指唔再買股票。